ጥቅምት ፳፮

✞✞✞ በስመ አብ ወወልድ ወመንፈስ ቅዱስ አሐዱ አምላክ ፡፡ አሜን ፡፡ ✞✞✞

❖ ጥቅምት ፳፮ (26) ❖

✝✝✝ እንኩዋን ለሐዋርያት "ቅዱስ ያዕቆብ" እና
"ቅዱስ ጢሞና" ዓመታዊ የዕረፍት በዓል በሰላም አደረሳችሁ ✝✝✝

+"+ ቅዱስ ያዕቆብ ሐዋርያ +"+

=>ይህ ቅዱስ ሐዋርያ በአባቶቻችን ሐዋርያት መካከል
ትልቅ ሞገስ የነበረውና የጌታችን ወንድም ተብሎ
የተጠራ ነው:: ቅዱስ ያዕቆብ ወላጅ አባቱ አረጋዊው
ቅዱስ ዮሴፍ (የእመቤታችን ጠባቂ) ሲሆን በልጅነቱ
ጥላው የሞተች እናቱ ደግሞ ማርያም ትባላለች:: በቤት
ውስጥም ስምዖን: ዮሳና ይሁዳ የተባሉ ወንድሞችና
ሰሎሜ የምትባል እህትም ነበረችው::

+እናቱ ማርያም ከሞተች በሁዋላ ዕጉዋለ ማውታ (ደሃ አደግ) ሆኖ ነበር:: ነገር ግን በፈቃደ እግዚአብሔር
አረጋዊ ዮሴፍ እመቤታችን ቅድስት ድንግል ማርያምን
ከቤተ መቅደስ ሊጠብቃት (ሊያገለግላት) ተቀብሎ
ሲመጣ ያ ቤተሰብ ተቀየረ:: የበረከት: የምሕረትና
የሰላም እመቤት የአምላክ እናቱ ገብታለችና ያ የሐዘን
ቤት ደስታ ሞላው::

+እመ ብርሃን ግን ገና ወደ ዮሴፍ ልጆች ስትደርስ
አለቀሰች:: የአክስቷ ልጆች የሚንከባከባቸው አጥተው
ቆሽሸው ነበር:: በተለይ ደግሞ ትንሹ ቅዱስ ያዕቆብ
ያሳዝን ነበር:: እመ ብርሃን ማረፍ አልፈለገችም::
ወዲያው ማድጋ አንስታ: ወደ ምንጭ ወርዳ: ውሃ
አምጥታ የሕጻኑን ገላ አጠበችው:: (በአምላክ እናት
የታጠበ ሰውነት ምስጋና በጸጋ ይገባዋል)

+እመቤታችን ጌታ ከመወለዱ በፊት ለ9 ወራት:
ከተወለደ በሁዋላ ደግሞ ለ2 ዓመታት ሕጻኑን ያዕቆብን
ተንከባከበችው:: ለ3 ዓመታት ከ6 ወራት ግን ድንግል
ማርያም አምላክ ልጇን ይዛ ተሰዳለችና ተለያዩ:: ከስደት
መልስ ግን ለ25 ዓመታት ቅዱስ ያዕቆብ ከጌታችን ጋር
ሲያድግ ወላጅ እናቱ ትዝ ብላው አታውቅም:: አማናዊቷ
እናት ከጐኑ ነበረችና::

+ሊቃውንት እንደ ነገሩን እመቤታችን ለቅዱስ ያዕቆብ ያልሰጠችው ነገር ቢኖር ሐሊበ ድንግልናዌ (የድንግልና ወተትን) ብቻ ነው:: ስለዚህም:-

"እመ ያዕቆብ በጸጋ ማርያም ንግሥተ ኩሉ" ይላል
መጽሐፍ:: (መልክዐ ስዕል)

+ቅዱስ ያዕቆብ "የጌታ ወንድም" ተብሎ በተደጋጋሚ
በሐዲስ ኪዳን ተጠርቷል:: ለዚህ ምክንያቱ:-

1=ለ30 ዓመታት ሳይነጣጠሉ አብረው በማደጋቸው፡፡
2=የጌታችን የሥጋ አያቱ የቅድስት ሐና የእህት ልጅ
በመሆኑ፡፡
3=በዮሴፍ በኩልም የአንድ ቅድመ አያት ልጆች
በመሆናቸው፡፡
4=ጌታችን ከትህትናው የተነሳ ደቀ መዛሙርቱን
"ወንድሞች" ይላቸው ስለ ነበር ነው:: (ሥጋቸውን
ተዋሕዶ ተገኝቷልና)

+ራሱ ቅዱስ ያዕቆብ ግን "የጌታችን የኢየሱስ ክርስቶስ
ባሪያ ነኝ" ብሎ በፈጣሪና በፍጡር መካከል ያለውን
ልዩነት ገልጧል:: (ያዕ. 1:1)

¤ቅዱስ ያዕቆብ ጌታችን ሲያስተምር ተከተለው
¤ከ72ቱ አርድእት ተቆጠረ
¤3 ዓመት ከ3 ወር ወንጌልን ተማረ
¤ለመጀመሪያ ጊዜ ከድንግል ማርያምና ከቅዱስ ዮሐንስ ጋር ሆኖ "የጌታን ትንሳኤ ሳላይ እሕል አልቀምስም" ብሎ ማክፈልን አስተማረ
¤መንፈስ ቅዱስን ተሞልቶ ወንጌልን አስተማረ
¤የኢየሩሳሌም የመጀመሪያው ሊቀ ዻዻስ ሆኖ
አገለገለ::

¤በመጀመሪያዎቹ የክርስትና ዘመናት የሐዋርያት
ሲኖዶሶችን በሊቀ መንበርነት መራ
¤ሙታንን አስንስቶ: ድውያንን ፈውሶ: የመካኖችን
ማሕጸን ከፍቶ: አጋንንትንም አስወጥቶ ብዙ ተእምራትን
ሠራ:: እጅግ ብዙ አይሁዳውያንን ወደ አሚነ ክርስቶስ
መልሶ መልካሙን ገድል ተጋደለ::

+በመጨረሻ ዘመኑ ያላመኑ የአይሁድ አለቆች ወደ ቤቱ
ተሰብስበው "የናዝሬቱ ኢየሱስ ማነው? የማንስ ልጅ
ነው?" ሲሉ ጠየቁት:: እነርሱ ሰይጣን በሰለጠነበት
ልቡናቸው "የዮሴፍ ልጅ ነው: የእኔም ወንድሜ ነው"
እንዲላቸው ጠብቀው ነበር:: (ሎቱ ስብሐት ወአኮቴት!!!)

+በልቡናቸው ያሰቡትን ተንኮል የተረዳው ሐዋርያ ወደ
ቤቱ ጣራ ወጥቶ መናገር ጀመረ:: "ለስም አጠራሩ
ጌትነት ይሁንና ጌታችን ኢየሱስ ክርስቶስ አምላክ ወልደ
አምላክ: ወልደ አብ ወልደ ማርያም: ሥግው ቃል
እግዚአብሔር ነው:: እኔም ፍጡሩና ባሪያው እንጂ
እንደምታስቡት ወንድሙ አይደለሁም" አላቸው::

+ንዴታቸውን መቆጣጠር ያልቻሉት አይሁድ ከላይ
ወጥተው ወደ መሬት ወረወሩት:: በገድል የተቀጠቀጠ
አካሉንም እየተፈራረቁ ደበደቡት:: አንዱ ግን ከእንጨት
የተሠራ ትልቅ ገንዳ አምጥቶ የቅዱሱን ራስ ደጋግሞ
መታው:: ጭንቅላቱም እንዳልነበር ሆነ:: ሰማዕቱ ሐዋርያ ቅዱስ ያዕቆብ ወደ ወደደው ክርስቶስ በዚህች ቀን ሔደ::

+ቅዱሱ ሐዋርያ ያዕቆብ ቤቱን እንደ ቤተ መቅደስ አበው ሐዋርያት ይጠቀሙባት ነበር:: በመላ ዘመኑ የሚያገድፍ ነገር (ጥሉላት) ቀምሶ: ጸጉሩን ተላጭቶ: ገላውን ታጥቦና ልብሱን ቀይሮ አያውቅም::

"ወዝንቱ ጻድቅ እኅወ እግዚእነ
ኢያብአ ውስተ አፉሁ ሥጋ ወወይነ
ወኢገብረ ሎቱ ክልኤተ ክዳነ" እንዲል::

+ከጾም: ከጸሎትና ከመቆሙ ብዛትም እግሩ አብጦ
አላራምድህ ብሎት ነበር:: ስለዚህም አበው "ጻድቁ
(ገዳማዊው) ሐዋርያ" ይሉታል::

=>ጌታችን ኢየሱስ ክርስቶስ ወንድሙ ይባል ዘንድ
ካደለው ሐዋርያ በረከትን ያድለን:: በምልጃውም
ምሕረትን ይላክልን::

+"+ ቅዱስ ጢሞና ሐዋርያ +"+

=>ቅዱሱ ሐዋርያ ቁጥሩ ከ72ቱ አርድእትና ከ7ቱ
ዲያቆናት ነው:: በሐዲስ ኪዳን ስማቸው ከተጠቀሰ
ሐዋርያትም አንዱ እርሱ ነው:: (ሐዋ. 6:6) በትውፊት
ትምሕርት እንደ ተማርነው ቅዱስ ጢሞና ጌታችንን
የተከተለው በመዋዕለ ስብከቱ ነው::

+በቅዱስ ሉቃስ ወንጌል (10:1) ላይ "ወፈነዎሙ
በበክልኤቱ" እንዲል: ሁለት ሁለት አድርጐ ሲልካቸው
ቅዱስ ጢሞና አንዱ ነበር::

በሔዱበትም በስሙ አጋንንት ተገዝተውላቸው: ድውያንም ተፈውሰውላቸው ደስ ብሏቸዋል:: ጌታችን ግን "አጋንንት ስለ ተገዙላችሁ ደስ አይበላችሁ:: ይልቁንስ ስማችሁ በመንግስተ ሰማያት ስለ ተጻፈ ደስ ይበላችሁ" ብሏቸዋል:: (ሉቃ. 10:17)

+ቅዱስ ጢሞና ጌታችንን እስከ ሕማሙ አገልግሎ:
የጌታን ትንሳኤ ተመልክቶ: በዕርገቱ ተባርኮ: በበዓለ
ሃምሳም ቅዱስ መንፈሱን ተቀብሎ ከፍጹምነት ደርሷል:: በመጀመሪያው ዘመንም ሐዋርያት አበው ለአገልግሎት 7ቱን ዲያቆናት ሲመርጡ እርሱን መንፈስ ቅዱስ አብሮ መርጦታል:: (ሐዋ. 6:5)

+በቅዱስ እስጢፋኖስ ሥር ሆኖም እንደሚገባ
አገልግሏል:: ከቅዱስ እስጢፋኖስ መገደል በሁዋላም
እንደ ሌሎቹ ሐዋርያት በዓለም ወንጌልን ሲሰብክ ኑሮ
በዚህች ቀን በሰማዕትነት ዐርፏል::

=>ከበረከቱ ያድለን::

=>ጥቅምት 26 ቀን የሚከበሩ ዓመታዊ የቅዱሳን
በዓላት
1.ቅዱስ ያዕቆብ ሐዋርያ (ወልደ ዮሴፍ)
2.ቅዱስ ጢሞና ሐዋርያ ወዲያቆን
3.ቅዱስ አግናጥዮስ
4.ቅዱስ ፊልዾስ

=>ወርሐዊ በዓላት
1.ቅዱስ ቶማስ ሐዋርያ
2.አቡነ ሐብተ ማርያም ጻድቅ
3.አቡነ ኢየሱስ ሞዐ ዘሐይቅ
4.ቅዱሳን ሰማዕታተ ናግራን
5.ቅዱስ አቡነ ሰላማ ከሣቴ ብርሃን

=>+"+ የእግዚአብሔርና የጌታ የኢየሱስ ክርስቶስ ባሪያ ያዕቆብ: ለተበተኑ ለአሥራ ሁለቱ ወገኖች:: ሰላም
ለእናንተ ይሁን:: ወንድሞቼ ሆይ! የእምነታችሁ መፈተን
ትዕግስትን እንዲያደርግላችሁ አውቃችሁ ልዩ ልዩ ፈተና
ሲደርስባችሁ እንደ ሙሉ ደስታ ቁጠሩት:: ትዕግስትም
ምንም የሚጐድላችሁ ሳይኖር ፍጹማንና ምሉዓን ትሆኑ
ዘንድ ሥራውን ይፈጽም:: +"+ (ያዕ. 1:1)

         ✞ ወስብሐት ለእግዚአብሔር ✞

"መንግሥተ ሰማያት ቀርባለችና ንስሐ ግቡ::"    /ማቴ ፫:፫/

ዝክረ ቅዱሳንን ተማሩ ብለን እንለምናችኋለን!!።

"ፍቅር ያጌብረኒ ከመ እንግር ዜናሆሙ ለቅዱሳን"የቅዱሳንን ዜና(ታሪክ)እንድመሰክር ፍቅር ያስገድደኛል::አባ ጊዮርጊስ ዘጋስጫ መጽሐፈሚስጥር
🔊ሁሉም እንዲያነበው invite shareያርጉ
መንፈሳዊ ፅሁፎች፣ስእሎች ካሎት
@FasilKFCይላኩልን
✝ኦርቶዶክስ ለዘላለም ትኑር
Join Us Today And Lets learn Togethellettps://gondarmaheber.blogspot.com
https://t.me/Be_ente_semoa_le_mareyam
━━━━━━━༺✞༻━━━━━━━