ሚያዚያ ፩

††† እንኳን ከተባረከ ወር ሚያዝያ እና ከጻድቁ አባታችን ቅዱስ ስልዋኖስ ወቅዱስ አሮን ካህን ዓመታዊ በዓል በሰላም አደረሳችሁ፤ አደረሰን። †††

††† በስመ አብ ወወልድ ወመንፈስ ቅዱስ አሐዱ አምላክ አሜን! †††

††† አባ ስልዋኖስ †††

††† ጻድቁ አባ ስልዋኖስ ግብፃዊ ሲሆኑ ከታላቁ መቃርስ መንፈሳዊ ልጆች አንዱ ናቸው:: ገና በሕጻንነታቸው ወደ ገዳም ገብተው ጾምን : ጸሎትን : ትሕርምትን ገንዘብ በማድረግ ታላቅ የንጽሕና ሰው ሁነዋል::

ከመካከለኛ እድሜአቸው ጀምረው ደግሞ የገዳመ አስቄጥስ አበ ምኔት ሆነው በመልካም እረኝነት አገልግለዋል:: ጻድቁን ለየት የሚያደርጉዋቸው አንዳንድ ተግባራት ነበሩ::

እርሳቸውን ጨምሮ ሁሉም ገዳማዊ ከጾምና ከጸሎት ባሻገር ሥራ ሠርቶ ማታ መመጽወት አለበት:: ያ ማለት ያለ ምጽዋት ውሎ ማደር አይፈቀድም ነበር:: ይሕም መነኮሳቱን ከጽድቅ ባለፈ ታታሪና ባተሌ አድርጉዋቸዋል::

አባ ስልዋኖስ በተሰጣቸው ጸጋ መላእክትን : ገነትና ሲዖልን ያዩ ነበር:: በዚሕ ምክንያት ስለ ኃጥአን ከማልቀስ ዐይናቸው ቦዝኖ አያውቅም:: የዚሕን ዓለም ብርሃን አላይም ብለው ቆባቸውን ዓይናቸው ላይ ጥለው በመልካም ሽምግልና በዚሕች ቀን አርፈዋል::

††† አምላካችን ከጻድቁ በረከት ያሳትፈን::

††† ቅዱስ አሮን ካህን †††

††† ቅዱስ አሮን:-
~የሊቀ ነቢያት ቅዱስ ሙሴ ወንድም::
~የነቢዪት ማርያም ታናሽ::
~የዮካብድና ዕንበረም ልጅ::
~የእግዚአብሔር ካህን እና
~የብሉይ ኪዳን ሊቀ ካህናት ነው::

††† እግዚአብሔር በብሉይ ኪዳን የነበረው የክህነት አገልግሎት ከእርሱ ዘር እንዳይወጣ ምሎለታል:: ዳታን : አቤሮንና ቆሬ ይህንን ቢቃወሙ ከነ ሕይወታቸው መሬት ተከፍታ ውጣቸዋለች:: በድፍረት "እናጥናለን" ብለው ወደ ደብተራ ኦሪት የገቡትንም እሳት ከሰማይ ወርዶ በልቷቸዋል::

ቅዱስ አሮንም በጌታ ትእዛዝ በትሩ ለምልማ : አብባና አፍርታ ተገኝታለች:: ይህም ለጊዜው ክህነት ከሱ ልጆች እንዳይወጣ ሲያደርግ በፍጻሜው ለድንግል ማርያም ምሳሌ ሆኗል::

የአሮን በትር ሳይተክሏት : ሳይደክሙባትና ውሃ ሳያጠጣት አብባና አፍርታ እንደተገኘች ድንግል ማርያምም የወንድ ዘር ምክንያት ሳይሆናት ፍሬ አፍርታለች (ክርስቶስን ወልዳለችና)::

††† አባ ሕርያቆስ "ጸናጽል ዘውስተ ልብሱ ለአሮን ካህን:: ወዓዲ በትር እንተ ሠረጸት : ወጸገየት : ወፈረየት" እንዳለ:: (ቅዳሴ ማርያም)

ቅዱስ አሮን በማዕጠንቱና በመስዋዕቱ ፈጣሪውን አገልግሎ : ድውያንንም ፈውሶ : እስራኤል በበርሃ ሳሉ አርፎ ተቀብሯል:: (ዘኁ. 20:25)
(ለተጨማሪ ንባብ 3ቱን ብሔረ ኦሪት (ከኦሪት ዘጸአት ምዕራፍ 4 ጀምረው እስከ ኦሪት ዘኁልቁ ምዕራፍ 20 ድረስ) ያንብቡ)

††† ክብሩ : በረከቱ ይደርብን::

††† ሚያዝያ 1 ቀን የሚከበሩ ዓመታዊ የቅዱሳን በዓላት
1.ቅዱስ አሮን ካህን (የሊቀ ነቢያት ሙሴ ወንድም)
2.አባ ስልዋኖስ ጻድቅ
3.ቅዱሳን መነኮሳት
4.ቅድስት መጥሮንያ

††† ወርኀዊ በዓላት
1.ልደታ ለማርያም ድንግል እግዝእትነ
2.ቅዱሳን ኢያቄም ወሐና
3.ቅዱስ ራጉኤል ሊቀ መላዕክት
4.ቅዱስ በርተሎሜዎስ ሐዋርያ
5.ቅዱስ ሚልኪ ትሩፈ ምግባር

††† "ስለ ሕዝብ እንደሚያቀርብ እንዲሁ ስለ ራሱ ደግሞ መስዋዕትን ስለ ኃጢአት ሊያቀርብ ይገባዋል:: እንደ አሮንም በእግዚአብሔር ከተጠራ በቀር ማንም ክብሩን ለራሱ የሚወስድ የለም::" †††
(ዕብ. 5:3)


     ✞ ወስብሐት ለእግዚአብሔር ✞
        ✞ ወለወላዲቱ ድንግል ✞
    ✞ ወለመስቀሉ ክቡር አሜን ✞
   
"መንግሥተ ሰማያት ቀርባለችና ንስሐ ግቡ::"    /ማቴ
ዝክረ ቅዱሳንን ተማሩ ብለን እንለምናችኋለን!!። 
  "ፍቅር ያጌብረኒ ከመ እንግር ዜናሆሙ ለቅዱሳን"የቅዱሳንን ዜና(ታሪክ)እንድመሰክር ፍቅር ያስገድደኛል::አባ ጊዮርጊስ ዘጋስጫ መጽሐፈሚስጥር
🔊ሁሉም እንዲያነበው invite shareያርጉ
መንፈሳዊ ፅሁፎች፣ስእሎች ካሎት
@FasilKFCይላኩልን
ኦርቶዶክስ ለዘላለም ትኑር
Join Us Today And Lets learn Together.https://gondarmaheber.blogspot.com
https://t.me/Be_ente_semoa_le_mareyam
━━━━━━━༺✞༻━━━━━━━